ភ្ញៀវទេសចរប្រមាណ ១,៨៩លាននាក់ បានធ្វើដំណើរទៅកាន់តំបន់ទេសចរណ៍នានានៅទូទាំងប្រទេសក្នុងអំឡុងពិធីបុណ្យភ្ជុំបិណ្ឌរយៈពេល៣ថ្ងៃ កើនឡើង ៥២,២ភាគរយបើធៀបនឹងរយៈពេលដូចគ្នាកាលពីឆ្នាំមុន។
របាយការណ៍របស់ក្រសួងទេសចរណ៍ បានបង្ហាញថា ភ្ញៀវបរទេសប្រមាណ ២៧,០០០នាក់ កើនឡើង ៩០,៥ភាគរយ ធៀបនឹងរយៈពេលមួយឆ្នាំ បានធ្វើដំណើរកម្សាន្តក្នុងព្រះរាជាណាចក្រកម្ពុជា ក្នុងអំឡុងពេលថ្ងៃឈប់សម្រាក។
របាយការណ៍បង្ហាញថា តំបន់វប្បធម៌ រួមមានខេត្តសៀមរាប ឧត្តរមានជ័យ កំពង់ធំ និងខេត្តព្រះវិហារ ដោយកត់ត្រាចំនួនភ្ញៀវទេសចរចំនួន ២០៤,៦០៧នាក់ និងតំបន់មាត់សមុទ្រដូចជា ខេត្តព្រះសីហនុ កែប កំពត និងកោះកុង ដែលមានភ្ញៀវទេសចរចំនួន ៣៥៧,០៣៩នាក់។
តំបន់ភាគពាយ័ព្យមានដូចជា ខេត្តបាត់ដំបង បន្ទាយមានជ័យ ពោធិ៍សាត់ និងប៉ៃលិន មានភ្ញៀវទេសចរណ៍ច្រើនជាងគេក្នុងអំឡុងថ្ងៃសម្រាករយៈពេល៣ថ្ងៃ មានចំនួន ៤១២,១០៧នាក់ ខណៈតំបន់ទេសចរណ៍ធម្មជាតិ រួមមានខេត្តក្រចេះ មណ្ឌលគិរី រតនគិរី និងស្ទឹងត្រែង ទទួលភ្ញៀវទេសចរបានចំនួន ៤៩,០៦៣នាក់។
ភ្ញៀវទេសចរប្រហែល ៨៦៤,០០០នាក់ បានទៅកម្សាន្តខេត្តផ្សេងៗទៀតក្នុងអំឡុងពេលនោះ។